വഴിയില്‍ സൂഫി എന്തോ തിരയുന്നത് കണ്ട നാട്ടുകാര്‍ ഒരുമിച്ചു കൂടി. കുറെ സമയം തിരച്ചില്‍ നടത്തിയെങ്കിലും പ്രത്യേകിച്ചൊന്നും കണ്ടില്ല.
നാട്ടുകാര്‍: അല്ലയോ സൂഫീവര്യരെ എന്താണ് നഷ്ടപ്പെട്ടത്.
സൂഫീ: എന്റെ സൂചി
നാട്ടുകാര്‍: എവിടെയാണ് നഷ്ടപ്പെട്ടത്?
സൂഫീ: വീട്ടില്‍
നാട്ടുകാര്‍: എന്നാല്‍ വീട്ടിലല്ലേ അന്വേഷിക്കേണ്ടത്.
സൂഫീ: സ്വന്തം ഹൃത്തിലുള്ള ദൈവത്തെ നിങ്ങള്‍ മറ്റിടങ്ങളില്‍ അന്വേഷിക്കുന്നില്ലേ.. അതിനേക്കാള്‍ വലുതൊന്നുമല്ലല്ലോ ഇത്.
കതക്
അര്‍ധരാത്രി കതകില്‍ മുട്ടുകേട്ട സൂഫി: ആരാ?
ആഗതന്‍ : മുസാഫിര്‍
സൂഫി തിരിഞ്ഞു നടന്നു.
ആഗതന്‍ വീണ്ടും കതകില്‍ മുട്ടുന്നു
സൂഫി: ആരാ?
ആഗതന്‍: അടിമ
സൂഫി വീണ്ടും തിരിഞ്ഞു നടക്കുന്നു.
വീണ്ടും കതകില്‍ മുട്ടുന്നു.
സൂഫി: ആരാ?
ആഗതന്‍: മനുഷ്യന്‍
സൂഫി തിരിഞ്ഞു നടക്കുന്നു.
വീണ്ടും മുട്ടുന്നു.
സൂഫി: എന്തിനാ മുട്ടുന്നത്,
അകത്തേക്ക് വന്നോളൂ... ഞാന്‍ കതക് അടച്ചിട്ടില്ല.
