നഗരത്തിന്റെ തിരക്കുകളില്‍ നിന്ന് മാറി, കാടുമൂടിയ വഴികളിലൂടെയുള്ള യാത്ര ഒടുവില്‍ അവസാനിച്ചത് ഒരു പഴക്കംചെന്ന ഇരുനില വീട്ടിലാണ്. സന്ധ്യമയങ്ങിയതിന്റെ ആലസ്യം ചുറ്റും പടര്‍ന്നിരിക്കുന്നു. ഗേറ്റ് തുറന്ന് അകത്തേക്ക് കയറുമ്പോള്‍ നിറയെ കരിഞ്ഞ ഇലകള്‍ വീണുകിടക്കുന്ന മുറ്റം സൂര്യന്‍ നായരുടെ ഒറ്റപ്പെട്ട ജീവിതത്തെ വിളിച്ചോതുന്നുണ്ടായിരുന്നു. വിരമിച്ചിട്ട് വര്‍ഷങ്ങള്‍ കഴിഞ്ഞു. പോലീസ് സേനയില്‍ നിന്ന് ലഭിച്ച പേരും പെരുമയും ഒരു പിടി പഴയ ഓര്‍മകളും പിന്നെ ഈ വീടും മാത്രമാണ് ഇപ്പോള്‍ കൂട്ട്. ഭാര്യ മരിച്ച് വര്‍ഷങ്ങളായി. മക്കളാണെങ്കില്‍ അവരവരുടെ ലോകത്തും.
ഇരുണ്ട ഹാളിലെ സോഫയില്‍, കസേരയിലേക്ക് ചാരി കണ്ണടച്ച് കിടക്കുമ്പോള്‍, അയാളുടെ മനസ്സില്‍ പഴയൊരു ദൃശ്യം മിന്നിമറഞ്ഞു. വര്‍ഷങ്ങള്‍ക്ക് മുന്‍പ്, പരിഹരിക്കപ്പെടാതെപോയ ഒരു കേസ്. ഒരു യുവതിയുടെ നിഗൂഢ മരണം. ഓര്‍മകള്‍ ഒരു പുളിച്ച കഷായം പോലെ അയാളെ പൊള്ളിച്ചു. അന്ന് ആ കേസ് പൂര്‍ത്തിയാക്കാന്‍ കഴിഞ്ഞിരുന്നെങ്കില്‍... മദ്യത്തിന്റെ ഒരു കവിള്‍കൂടി തൊണ്ടയിലൂടെ ഇറങ്ങിയപ്പോള്‍, ആ ഓര്‍മകള്‍ക്ക് ഒരു നേരിയ ശമനം കിട്ടി. അത്ര മാത്രം. സൂര്യന്‍ നായര്‍ പതിയെ എഴുന്നേറ്റു, ജനലിലൂടെ പുറത്തേക്ക് നോക്കി. ഇരുട്ട് കനത്തിരിക്കുന്നു. എവിടെ നിന്നോ ഒരു മൂങ്ങയുടെ ശബ്ദം കേട്ടു.
ഫോണ്‍ ശബ്ദിച്ചത് ആ നിശബ്ദതയെ ഭേദിച്ചുകൊണ്ടാണ്. ഡിസ്‌പ്ലേയില്‍ ഒരു അപരിചിത നമ്പര്‍ തെളിഞ്ഞു. സാധാരണ ഇങ്ങനെയുള്ള കോളുകള്‍ എടുക്കാറില്ല. എങ്കിലും എന്തോ ഒരു തോന്നലില്‍ അയാള്‍ ഫോണ്‍ എടുത്തു.
'ഹലോ?'
മറുതലയ്ക്കല്‍ ഒരു യുവ ശബ്ദം. 'സൂര്യന്‍ നായര്‍ സര്‍ അല്ലേ? ഞാന്‍ എസ്.ഐ. രാഹുല്‍. പന്തീരാങ്കാവ് സ്റ്റേഷനില്‍ നിന്നാണ്.'
സൂര്യന്‍ നായര്‍ക്ക് അത്ഭുതമായി. ഈ യുവ തലമുറയിലെ പോലീസ് ഉദ്യോഗസ്ഥര്‍ക്ക് തന്നെ എന്ത് ആവശ്യം?
'പറയൂ, എന്തുണ്ട്?' അയാളുടെ ശബ്ദത്തില്‍ താല്‍പ്പര്യമില്ലായ്മ പ്രകടമായിരുന്നു.
'സാര്‍, ഞങ്ങള്‍ക്കൊരു അത്യാവശ്യമുണ്ട്. നേരില്‍ കാണാന്‍ സാധിക്കുമോ?' രാഹുലിന്റെ ശബ്ദത്തില്‍ അപേക്ഷ കലര്‍ന്നിരുന്നു.
സൂര്യന്‍ നായര്‍ക്ക് ഒരു നിമിഷം സംശയമായി.
'എന്തിന്?'
'ഒരു പുതിയ കേസ് സാര്‍. സാറിന്റെ സഹായം കൂടിയേ തീരൂ.'
ഒരു കേസ്! അയാളുടെ മനസ്സില്‍ വീണ്ടും ആ പഴയ മുറിവ് ഉണങ്ങുന്നതുപോലെ തോന്നി. അയാള്‍ക്ക് പഴയ ജീവിതത്തിലേക്ക് മടങ്ങിപ്പോകാന്‍ ഒട്ടും താല്‍പ്പര്യമുണ്ടായിരുന്നില്ല.
'രാഹുല്‍, ഞാന്‍ ഇപ്പോള്‍ റിട്ടയേര്‍ഡ് ആണ്. എനിക്കിതിലൊന്നും താല്‍പ്പര്യമില്ല,' അയാള്‍ മുരണ്ടു.
'സാര്‍, ഇതൊരു സാധാരണ കേസല്ല. വളരെ ക്രൂരമായ ഒരു കൊലപാതകമാണ്. സാറിന്റെ അനുഭവം ഞങ്ങള്‍ക്ക് അത്യാവശ്യമാണ്,' രാഹുല്‍ വിട്ടുകൊടുത്തില്ല. 'ഞങ്ങള്‍ ഇപ്പൊ സാറിന്റെ വീടിന്റെ അടുത്തുണ്ട്. ഒരു പത്ത് മിനിറ്റ്, ഞങ്ങള്‍ എത്തിക്കോളാം.'
മറുപടിക്ക് കാത്തുനില്‍ക്കാതെ രാഹുല്‍ ഫോണ്‍ വെച്ചു. സൂര്യന്‍ നായര്‍ക്ക് ദേഷ്യം വന്നു. എങ്കിലും, ഒരു കൊലപാതകമെന്ന വാക്ക് അയാളുടെ മനസ്സില്‍ ഒരു കല്ലെടുത്തിട്ട പോലെ കിടന്നു. പഴയ സിംഹത്തിന്റെ ഉള്ളില്‍ ഉറങ്ങിക്കിടന്ന വേട്ടക്കാരന്‍ പതിയെ ഉണരുന്നതുപോലെ.
(തുടരും)
0 അഭിപ്രായങ്ങള്‍
Thanks